"Bapak Budi Raharja"
Abdi Dalem Kang Sumeleh
Asmanipun Bapak Budi Raharja saged
dipun timbali Pak Budi. Saksampunipun resmi dados abdi dalem Ngayogyakarta
Hadiningrat inggih menika dipun angkat dening Sinuhun Dalem Sultan Hamengku
Buwono IX asmanipun dados Mas Bekel Hastana Raharja. Miyos wonten Kutho Gede
tanggal 31 sasi Desember warsa 1957. Pak
Budi menika dados abdi dalem wonten ing Pasarean Raja-raja Kutho Gede Mataram.
Inggih menika langkung mliginipun Kelompok Usaha Bersama Abdi Dalem Juru Kunci Pasarean
Kutho Gede Mataram Surakarta - Ngayogyakarta. Gegayutan kaliyan pendidikanipun,
Pak Budi namung lulusan Sekolah Dasar tahun 1977. Pak Budi menika kagungan
setunggal estri lan setunggal putra lan kalih wayah.
Kersane dados
abdi dalem menika sampun saking tahun 1977. Ananging kaangkatipun resmi dados
abdi dalem sinuhun Ngayogyakarta Hadiningrat awit tahun 1984. Kirang langkung
wonten 60 abdi dalem ingkang ngabdi ing pasarean menika. Lajeng sistematisipun
inggih menika gantosan saben dinten inggih menika 6 abdi dalem. Pandamelan
saben dinten abdi dalem wonten ing pasarean Kutho Gede Raja Mataram menika
nindakaken dhawuhipun dalem sinuhun. Antawisipun ingkang sepisan njagi
karesikan, kaendahan saha keamanan wonten pesarean menika. Lajeng sanesipun
inggih menika caos kintun donga tahlil saben dinten senen, kemis kalian jum’at.
Dados abdi dalem
menika sampun kersanipun pak Budi saking jeroning ati. Pak Budi menika kagungan
raos tresna ingkang ageng sanget dhumateng kraton Ngayogyakata Hadiningrat,
amargi Ngayogyakarta menika dipun raosaken pak Budi dados negara kalairanipun.
Miturut pak Budi dados abdi dalem menika ndadosaken rejeki ingkang dipun
paringi Gusti Kang Murbeng Donya. Utawi saged dipun jelasaken bilih dados abdi
dalem menika saget marantarani rejekinipun saking Gusti. Raos ngabdi lan urmat
dhumateng Kraton Ngayogyakarto saha Sri Sultan Hamengku Buwono kedah pun jagi
lan ditancapaken jero wonten ing penggalih lan manah saben abdi dalem.
Boten wonten rasa pamrih wonten ing
penggalih pak Budi. Sanadyan gaji ingkang dipun paringi Sinuhun dhumateng abdi
dalem menika estunipun mboten saged nyekapi panguripan abdi dalem saha
kaluwarganipun, nanging kathah para abdi dalem ingkang seged nyekolahaken putra
putrinipun dumugi sarjana. Menika ngabuktekaken menawi menopo ingkang kita
usahakaken mboten mesti sami kalian menopo ingkang kita asilaken. Tegesipun
kita mboten pareng anggadhahi pamikiran menawi pakarya ingkang kita lampahi
mesthi asilipun sami kaliyan pakarya menika, pakarya menika namung prantarane
Gusti Kang Maha Kuwaos Maringi rejeki dhumateng kita. Nanging kita kedah tetep
nglairaken usaha ingkang ageng dhumateng manah kita, supados Gusti ugi maringi
rejeki ingkang ageng dhumateng kita.
“Urip
kula menika sampun sumeleh, intinipun urip menika kedah ikhlas lan sabar”,
menika ngendikanipun pak Budi. Rasa menika ingkang ndamel pak budi tetep semangat
lan tetep usaha maksimal nglampahi dados abdi dalem, amargi pak Budi menika
Percaya bilih Gusti mesthi bakal maringi rejeki kang hikmah lan barokah.
Afwaz Muhamad Afif (11205244040)
Tidak ada komentar:
Posting Komentar